台灣疫情下呢半年生意難做嗎？
呢幾個月好多日希既客戶朋友被安排同里奧傾生意經，大家第一句就問里奧疫情下生意仲有冇得做，呢個問題其實真係問得好好，講真 香港人在台灣有幾多個可以打工賺錢生活？自己做生意幾乎係唯一出路，要靠做生意嚟申請移民就更加要加油💪💪。
自四月開始因為台灣本土多日零確診，五月開始公司零售既業務V型反彈，幾乎所有分店都做到同事叫曬救命要增加人手，一直忙到8月先回復正常，所以今日就嚟同大家分享一下呢半年疫情之下台灣既營運情況啦。
二月靜得恐怖
記得一月份里奧仲係香港過年，當月雖然已有疫情消息但台灣既生意都算唔錯，之後二月返到台灣好快隨著疫情數字不斷增加，生意額越嚟越少 越嚟越少 再越嚟越少 直到有一日全部分店一個客都冇。呢一刻要諗既係，我地係咪要cut人手呢？
里奧既零售業務一共有12位同事，分佈三個不同地區既分店，加上main office 既同事都有4,5個，如果持續零生意里奧又可以頂到幾耐呢？嗱嗱淋同會計傾下公司既錢可以蝕到幾多個月。
員工係公司最重要既資產，由一個新同事入職到純熟，再對公司產生歸屬感，整個過程需要好長時間，如果疫情只係三幾個月就過，之後再花幾個月時間去培養新同事？成本可能更加高。
但始終都要面對現實，公司唔大，冇生意時要繼續出糧嗰種壓力唔係講笑，始終都要set個deadline 比自己，可以頂到幾多個月，過了deadline 就算幾唔想都要cut ，所以最後決定5/31 如果都未有回復正常，就先cut 入職一年內既同事，之後再計劃。
二月就好似過冬一樣，公司雖然已經預左一筆錢去蝕，但每一日都擔心緊仲要捱幾多個月，到底有咩開支可以cut 呢？有咩promotion可以推出去吸引消費呢？所以就約齊全公司既店長開會。
吸取沙士時別人的經驗，賤物鬥窮人
當年沙士時里奧尚算年輕，做生意經驗好弱，但記得當時既物價好平，但就算你肯減價套現，都一定要快，如果到最後週街都特價時，你已經變得冇咩特別，所以店長們都同意呢個做法，將啲非熱賣款式賤價賣，真的叫平到你唔信，再加碼比廣告費，全部集中網購推銷，實體店就採預約制，入店前做足防疫措施。
同事真係冇令我失望，就算當時店面冇客，同事就利用公司既IG FB 平台幫手做直播，一個用手機拍攝就另一個介紹，就係咁客人睇完直播就到官方網站落單，二、三月好好彩安然渡過，竟然仲有少許盈利。
四月份本來係傳統旺季開始
里奧公司既產品每年四月開始係旺季既開始，今年就一定差過上年好多，就算二月尾開始推出既promotion有效都唔可能持續到幾個月，所以疫情控制到先係重點，呢方面真要大讚台灣政府，由四月中開始已經明顯地控制到疫情，市民開始忍唔住要出街消費，雖然人數與去年同期無得比，但明顯地消費力慢慢出翻嚟，呢個時候賤價促銷都要慢慢準備結束啦。
五月份…一個新既開始
話咁快又到五月，情況開始明朗化，兼職同事既排班開始增加，出貨量係正常價既情況下開始有提升，一個星期比一個星期好，廣告商、網紅紛紛出翻嚟聯絡，自己出街食飯次數都多咗，餐廳人流都明顯增加，自己都覺得應該差唔到啦，不過就估唔到V型反彈既力度會如此驚人。
6-8月既情況比去年還要好，點解？
待續……今日分享住咁多先
#里奧叔叔
#好鐘意傾生意經
#日希移民
#創新創業移民
#創業家簽證
#投資移民
#移民台灣
Search